મોરબી: રાષ્ટ્રનિર્માણ અને ભાવિ પેઢીના ઘડવૈયા એવા શિક્ષકોના વ્યાવસાયિક સન્માન માટે મોરબીમાંથી એક મહત્વપૂર્ણ પહેલ શરૂ થઈ છે. ગુજરાત રાજ્ય શિક્ષણ સેવા વર્ગ-3 (નો.ક.) કર્મચારી મંડળ તથા સરકારી માધ્યમિક અને ઉચ્ચતર માધ્યમિક શિક્ષક સંઘ, મોરબી દ્વારા રાજ્યના શિક્ષકોના નામ આગળ સત્તાવાર રીતે “Tr.” (Teacher) ઉપસર્ગ જોડવાની મંજૂરી આપવા શિક્ષણ મંત્રીશ્રી તેમજ જિલ્લા શિક્ષણ અધિકારીને લેખિત રજૂઆત કરવામાં આવી છે.

આગવી વ્યાવસાયિક ઓળખની જરૂરિયાત
જેમ તબીબો માટે "Dr.", વકીલો માટે "Adv." અને પ્રોફેસરો માટે "Prof." જેવા ઉપસર્ગો તેમની સામાજિક પ્રતિષ્ઠા અને વ્યાવસાયિક ઓળખ દર્શાવે છે, તેવી જ રીતે સમાજના પાયા સમાન શિક્ષકોને પણ વિશેષ સંબોધન મળવું જોઈએ. ડૉક્ટર કે એન્જિનિયર સહિતના તમામ ક્ષેત્રોના માનવબળનું મૂળ ઘડતર શિક્ષકના વર્ગખંડમાંથી જ થાય છે, જેથી આ માંગ કોઈ સરખામણી માટે નહીં પરંતુ શિક્ષકના આત્મસન્માન માટે છે.

રજૂઆતના મુખ્ય ઉદ્દેશો

* શિક્ષકોમાં વ્યાવસાયિક ગૌરવ અને સમાજમાં તેમની આગવી ઓળખ સ્થાપિત કરવી.
* શિક્ષણ કાર્ય સાથે જોડાયેલા કર્મચારીઓના મનોબળ અને ઉત્સાહમાં વધારો કરવો.
* નવી શિક્ષણ નીતિ (NEP-2020) અંતર્ગત શિક્ષકની કેન્દ્રીય ભૂમિકાને વધુ બળ આપવું.
* સમગ્ર રાજ્યના શિક્ષક પરિવારને સમાન અને સન્માનજનક સંબોધન પૂરું પાડવું.

શિક્ષક સમાજે આશા વ્યક્ત કરી છે કે સરકાર આ સંવેદનશીલ બાબતને ગંભીરતાથી લઈ શિક્ષકોના નામ આગળ "Tr." લગાવવા સત્વરે સત્તાવાર મંજૂરી આપશે. કારણ કે, શિક્ષકનું ગૌરવ વધશે તો જ શિક્ષણ અને રાષ્ટ્રનું ભવિષ્ય વધુ ઉજ્જવળ બનશે.