મોરબી : મોરબી શહેરમાં અબોલ પશુઓ પર અત્યાચાર ગુજારવાની અને તેને રોકવા જતા આર્મી જવાનને ધમકી આપવાની ઘટના સામે આવી છે. શહેરની મોચી શેરીમાં રહેતા એક આર્મી વેટરન દ્વારા આ મામલે મોરબી સીટી એ ડિવિઝન પોલીસ મથકમાં લેખિત ફરિયાદ કરવામાં આવી છે.

મોરબીની મોચી શેરીમાં રહેતા 57 વર્ષીય આર્મી વેટરન ચેતન ભગવાનજી સોલંકીએ તે જ શેરીમાં રહેતા શખ્સ વિરુદ્ધ અરજી આપી છે. ચેતન સોલંકીએ પોતાની રજૂઆતમાં જણાવ્યું છે કે, આરોપી અવારનવાર શેરીમાં રહેતા ગાય અને કુતરાઓને લાકડી અને લોખંડના પાઇપ વડે ફટકારીને ક્રૂરતા આચરે છે. આ મામલે તારીખ 15/05/2026 ના રોજ રાત્રે 08:15 વાગ્યાની આસપાસ જ્યારે ચેતન સોલંકીએ આરોપીને અબોલ પશુઓને માર મારવાની ના પાડી, ત્યારે આરોપીએ ગમેતેમ ગાળો બોલીને તેમને જાનથી મારી નાખવાની ધમકી આપી હતી. આ બનાવ બાદ આર્મી વેટરન ચેતન સોલંકીએ મોરબી સીટી એ ડિવિઝન પોલીસ સ્ટેશનના પોલીસ ઇન્સ્પેક્ટરને લેખિત અરજી આપીને આરોપી વિરુદ્ધ યોગ્ય કાનૂની કાર્યવાહી કરવા માંગ કરી છે. પોલીસે અરજી સ્વીકારીને વધુ તપાસ હાથ ધરી છે.