સસરાના ઘરે રહેવા મુદે ફરિયાદ કે વોરંટ ન હોવા છતાં પરિણીતાને ઘરેથી ઉઠાવીને પોલીસે હેરાન કર્યાનો આરોપ .
મોરબી: મોરબીમાં પરિણીતાએ પોલીસ પર ગંભીર આરોપો લગાવ્યા છે, જેમાં તેમણે દાવો કર્યો છે કે પોલીસે તેમને આખી રાત પોલીસ સ્ટેશનમાં બેસાડી રાખ્યા. આ ઘટના ત્યારે બની જ્યારે પરિણીતા તેમના સાસરાના ઘરે રહેવા ગયા હતા.
પરિણીતાનો આરોપ:
નિધિબેન ચિરાગભાઈ અઘારાએ જણાવ્યું કે તેઓ ત્રણ વર્ષ પહેલા તેમના પતિ ચિરાગ દ્વારા તેમના પિયરમાં મૂકી દેવામાં આવ્યા હતા, જે અભ્યાસ કરવા માટે ગયા હતા. હવે અભ્યાસ પૂરો થયા બાદ તેઓ ફરીથી સાસરાના ઘરે રહેવા ગયા. સાસરિયાઓએ તેમને ઘરમાં તો આવવા દીધા, પરંતુ બાદમાં પોલીસને બોલાવી.
નિધિબેનનો આરોપ છે કે જ્યારે પોલીસે તેમને પૂછપરછ કરી, ત્યારે તેમણે વોરંટ કે ફરિયાદ વિશે પૂછ્યું, જેના જવાબમાં પોલીસે ના પાડી. ત્યારબાદ સાસરિયાં અને પાડોશીઓએ તેમને મારવાનો પ્રયાસ કર્યો. પોતાના બચાવ માટે નિધિબેને એક રૂમમાં અંદરથી દરવાજો બંધ કરી દીધો. પોલીસે અને નારી સુરક્ષાની મહિલાઓએ દરવાજો ખોલાવવા માટે સમજાવવાનો પ્રયાસ કર્યો, પરંતુ તેમણે તેમ કર્યું નહીં. અંતે, પોલીસે રૂમનો લોક તોડીને તેમને જીપમાં બેસાડી દીધા અને આખી રાત પોલીસ સ્ટેશનમાં બેસાડી રાખ્યા.
પોલીસનો ખુલાસો:
એ ડિવિઝન પીઆઈ રાકેશ પટેલે પરિણીતાના આરોપોને રદિયો આપતા કહ્યું કે, તેમને પરિણીતાના સાસરા પક્ષ તરફથી લેખિત અરજી મળી હતી. અરજીમાં જણાવવામાં આવ્યું હતું કે પરિણીતા રૂમમાં અંદરથી લોક મારીને બેઠા છે અને કોઈ અજુગતું પગલું ભરી શકે તેવી આશંકા છે.
પોલીસે જણાવ્યું કે તેઓ ઘટનાસ્થળે પહોંચ્યા અને કલાકો સુધી પરિણીતાને સમજાવવાનો પ્રયાસ કર્યો, પરંતુ તે દરવાજો ખોલવા તૈયાર નહોતા. ત્યારબાદ, રૂમનો દરવાજો તોડીને તેમને સુરક્ષિત બહાર કાઢીને પોલીસ સ્ટેશન લઈ જવામાં આવ્યા. પોલીસે તેમને નિવેદન નોંધાવવા અને જો ફરિયાદ કરવી હોય તો તે માટે પણ પૂછ્યું, પરંતુ પરિણીતાએ ના પાડી અને માત્ર સાસરાના ઘરે પાછા જવાની જીદ કરી.
પોલીસે એમ પણ જણાવ્યું કે તેઓ મહિલાની સુરક્ષાને ધ્યાનમાં રાખીને તેમને તેમના પિયર મૂકવા પણ તૈયાર હતા. જોકે, જ્યારે પોલીસ તેમને તેમના સાસરાના ઘરે મૂકવા ગઈ, ત્યારે સાસરિયાઓએ ઘરને તાળું મારી દીધું હતું અને ક્યાંક જતા રહ્યા હતા. પોલીસે સ્પષ્ટ કર્યું કે તેમની સામે કોઈ કાયદેસરની કાર્યવાહી કરવામાં આવી નથી અને માત્ર તેમની સુરક્ષા માટે જ તેમને પોલીસ સ્ટેશનમાં રાખવામાં આવ્યા હતા.
