આકર્ષક પ્રવેશદ્વાર, એડમિન બ્લોક, ટિકિટ કાઉન્ટર,રિસેપ્શન ઝોન, મનોરંજન અને ખાણી-પીણી, મુલાકાતીઓ માટે કેફે, દુકાનો, પેવ્ડ પાથવે, બેસવા માટે સુંદર ગેઝેબો સ્ટ્રક્ચર્સ, લેન્ડસ્કેપિંગ પાણીના ફુવારા પ્લાન્ટેશન પટ્ટા, લીનીયર ગાર્ડન સહિતની સુવિધાઓ ઉપલબ્ધ કરાશે

મોરબી :  મોરબી શહેરના ઐતિહાસિક અને સાંસ્કૃતિક વારસા સમાન રાણીબાગને હવે આધુનિક ઓપ આપવાની તૈયારીઓ મોરબી મહાનગરપાલિકા દ્વારા શરૂ કરી દેવામાં આવી છે. જેમાં મનપના ગાર્ડન શાખા દ્વારા અંદાજિત રૂ.2.21 કરોડના ખર્ચે આ ગાર્ડનને આધુનિક સુવિધાઓથી સજ્જ કરવા માટેની ટેન્ડર પ્રક્રિયા હાથ ધરવામાં આવી છે.
 

નવીન સુવિધાઓમાં નગરજનોને મનોરંજનની સાથે સુવિધાજનક વાતાવરણ મળી રહે તે માટે પ્રોજેક્ટમાં આધુનિક ઇન્ફ્રાસ્ટ્રક્ચરનું માળખું તૈયાર કરવામાં આવ્યું છે. જેમાં નવું આકર્ષક પ્રવેશદ્વાર, એડમિન બ્લોક, ટિકિટ કાઉન્ટર અને રિસેપ્શન ઝોન, મનોરંજન અને ખાણી-પીણી, મુલાકાતીઓ માટે કેફે, દુકાનો, પેવ્ડ પાથવે અને બેસવા માટે સુંદર ગેઝેબો સ્ટ્રક્ચર્સ (છત્રીઓ), લેન્ડસ્કેપિંગ પાણીના ફુવારા/તત્વો, પ્લાન્ટેશન પટ્ટા, લીનીયર ગાર્ડન અને ગ્રીન બફર ઝોન સાથેની આધુનિક ડિઝાઇન, પાર્કિંગ અને સુરક્ષા, વાહનો માટે પૂરતી પાર્કિંગ વ્યવસ્થા, સિક્યુરિટી પોસ્ટ અને સ્થાનિકો માટે અલગ ગાર્ડન એન્ટ્રીની સુવિધાઓ ઉપલબ્ધ કરાશે.

મોરબી મહાનગરપાલિકાની ગાર્ડન શાખાના નાયબ ઇજનેરના જણાવ્યા અનુસાર, આ પ્રોજેક્ટ માટેની ટેન્ડર પ્રક્રિયા હાલ ઓનલાઇન માધ્યમથી શરૂ કરી દેવામાં આવી છે. આ કામગીરી પૂર્ણ થતા જ મોરબીના શહેરીજનોને ભેટ સ્વરૂપે એક સુવિધાજનક અને આહલાદક પર્યટન સ્થળ મળી રહેશે. ઐતિહાસિક ધરોહર જળવાઈ રહે અને સાથે નવી પેઢીને આધુનિક ગાર્ડનનો અનુભવ મળે તેવો સમન્વય આ પ્રોજેક્ટમાં જોવા મળશે તેવું મહાનગર પાલિકાની યાદીમાં જણાવાયું છે.