ઇન્ટરનેશનલ માર્કેટમાં ગેસના ભાવ ઘટી ગયા હોવા છતાં ઉંચા ભાવે ગેસ સપ્લાય કરાતો હોવાથી ઉધોગકારોનો પ્રોપેન અને એલપીજીની ખરીદી બંધ કરવાનો નિર્ણય
મોરબી : મોરબીના સીરામીક ઉદ્યોગકારોએ આજે મનમાની ચલાવતી પ્રોપેન અને એલપીજી ગેસ કંપનીઓ સામે બાયો ચડાવી છે. જો કે નેચરલ ગેસ કરતા પ્રોપેન અને એલપીજી ગેસ પ્રમાણમાં થોડો સસ્તો પડતો હોવાથી સીરામીક ઉદ્યોગકારો પ્રોપેન અને એલપીજી ગેસના વપરાશ તરફ વળ્યા હતા. પણ ઇન્ટરનેશનલ માર્કેટમાં ગેસના ભાવ ઘટી ગયા હોવા છતાં પ્રતિ ટન 5000 રૂપિયા ઉંચા ભાવે ગેસ સપ્લાય કરવામાં આવતો સીરામીક ઉધોગકારો લાલઘૂમ થયા છે અને આ ગેસ કંપનીઓ સામની જોહુકમી સામે ન ઝૂકીને સીરામીક ઉધોગકારોએ સિન્ડિકેટ કરી લૂંટ ચલાવતા ડીલરો પાસેથી ગેસ નહીં ખરીદવાનો સામુહિક નિર્ણય લીધો છે.
મોરબી સીરામીક એસોસીએશનમાં નેતૃત્વમાં આજે સીરામીક ઉધોગકારોની તાકીદની બેઠક મળી હતી. જેમાં ઉધોગકારોએ જણાવ્યું હતું કે, પ્રોપેન અને એલપીજીના ભાવ છેલ્લા ત્રણ મહિનાથી ઇન્ટરનેશનલ માર્કેટમાં સતત ઘટતા હોવા છતાં પ્રોપેન ગેસ સપ્લાય કરતી કંપનીઓ દ્વારા સિન્ડિકેટ બનાવી ઇન્ટરનેશનલ પ્રાઈઝ મુજબ ગેસ સપ્લાય કરવાને બદલે મોનોપોલી બનાવી ઊંચા ભાવમાં સપ્લાય કરવામાં આવી રહ્યો હોવાથી ટાઇલ્સ એક્સપોર્ટ થતી હોઈ ઉંચા ભાવનો ગેસ વપરાશ કરતા પડતર કિંમત ઉંચી આવતા ઇન્ટરનેશનલ માર્કેટમાં મોરબી ઉદ્યોગ ટકી શકતો નથી .આથી ગેસ કંપનીઓની મોનોપોલી અને સિન્ડિકેટ સામે મોરબીનો સીરામીક ઉદ્યોગ આકરાપાણીએ થયો છે. આ પ્રોપેન અને એલપીજી ગેસ કંપનીઓ ઉંચા ભાવ વસૂલીને ઉઘાડી લૂંટ ચલાવતા હોવાથી સીરામીક એસોસિએશનના નેતૃત્વમાં તમામ સીરામીક ઉધોગકારોએ આજે આપતકાલીન બેઠક બોલાવી આ બેઠકમાં નક્કી થયા મુજબ હાલ આશરે 5000 રૂપિયા પ્રતિ ટન ઊંચા ભાવમાં પ્રોપેન સપ્લાય કરવામાં આવે છે. જેથી આ મુદ્દાની ગંભીરતા લઇ ઉદ્યોગકારો દ્વારા વધુ દાદાગીરી કરતી કંપની પાસેથી પ્રોપેનની ખરીદી બંધ કરવા સામુહિક નિર્ણય લેવામાં આવ્યો હતો.
