ભગવતી જગદંબા ના આરાધના મહાપર્વ નવરાત્રિના ચોથા દિવસે માતા કુષ્માંડાની પૂજા કરવામાં આવે છે. આ દિવસે તેમની પૂજા કરવાથી ભક્તોને રોગમુક્તિ, સુખ-સમૃદ્ધિ અને યશની પ્રાપ્તિ થાય છે.
માતા કુષ્માંડા કોણ છે?
માતા કુષ્માંડા એ આદિશક્તિનું સ્વરૂપ છે, જેમણે પોતાના હાસ્યથી બ્રહ્માંડની રચના કરી હતી. 'કુષ્માંડા' શબ્દનો અર્થ થાય છે: 'કૂ' એટલે નાનું, 'ઉષ્મા' એટલે ગરમી કે ઊર્જા, અને 'અંડા' એટલે બ્રહ્માંડ. એટલે કે, જેણે પોતાની નાની ઊર્જાથી આખું બ્રહ્માંડ બનાવ્યું હોય.
માતાજીનું આ સ્વરૂપ સિંહ પર બિરાજમાન છે અને તેમના આઠ હાથમાં ધનુષ, બાણ, કમળ, અમૃત કળશ, ગદા, ચક્ર વગેરે શસ્ત્રો અને સાધનો છે.
પૂજાનું મહત્વ અને લાભ
માતા કુષ્માંડાને સૂર્યદેવના શાસક માનવામાં આવે છે. તેથી, તેમની પૂજા કરવાથી ભક્તોને સૂર્ય જેવી તેજસ્વીતા અને શક્તિ મળે છે. તેમની આરાધનાથી જીવનમાં આવતા તમામ દુ:ખ અને રોગો દૂર થાય છે. એવું માનવામાં આવે છે કે માતાજીની પૂજા કરવાથી ભક્તોને શક્તિ, સૌભાગ્ય અને આરોગ્યની પ્રાપ્તિ થાય છે.
જે લોકોને શારીરિક સમસ્યાઓ અથવા માનસિક તણાવ હોય, તેમના માટે આ દિવસે માતાજીની પૂજા કરવી ખૂબ જ લાભદાયક છે. આ દિવસે માતાજીને માલપૂઆનો ભોગ ધરાવવામાં આવે છે.
આમ, ચોથા નોરતાના દિવસે માતા કુષ્માંડાની પૂજા કરવાથી ભક્તોને બ્રહ્માંડની શક્તિ અને સૌભાગ્ય પ્રાપ્ત થાય છે.

ભાગવતાચાર્ય
શાસ્ત્રીજી શ્રી કૃષ્ણચંદ્ર ડી.દવે 
મહાવીર નગર સોસાયટી
સામાકાંઠે ગજાનન મોરબી -૨
મો.80009 11444