બે દિવસ પહેલા ભાઈ સાથે થયેલી બોલાચાલીનો ખાર રાખી આરોપીએ સ્કોર્પિયો કાર મિત્રની ક્રેટા કાર સાથે ભટકાડી નુકસાન પહોંચાડ્યાની બી ડિવિઝનમાં ફરિયાદ

મોરબી : મોરબીના વીસીપરા વિસ્તારમાં જૂની અદાવતનો ખાર રાખી એક શખ્સે યુવાનને જાનથી મારી નાખવાની ધમકી આપી તેની કાર સાથે પોતાની સ્કોર્પિયો કાર અથડાવી નુકસાન પહોંચાડ્યાની ઘટના સામે આવી છે. આ મામલે ભોગ બનનાર યુવાને મોરબી સિટી બી ડિવિઝન પોલીસ મથકમાં ફરિયાદ નોંધાવી છે.

મોરબીના વીસીપરા આવેલા કુલીનગર-1માં રહેતા શાહરૂખભાઈ ફિરોજભાઈ પઠાણ (ઉ.વ. 32) ને બે દિવસ પહેલા આરોપી સાજીદભાઈ સાઉદીનભાઈ જેડા (રહે. યમુનાનગર, મોરબી) ના ભાઈ સાથે કોઈ બાબતે બોલાચાલી થઈ હતી. આ બોલાચાલીનો ખાર રાખીને આરોપી સાજીદભાઈએ શાહરૂખભાઈને ફોન પર જાનથી મારી નાખવાની ધમકી આપી હતી. ત્યારબાદ ગત તારીખ 20/04/2026 ના રોજ સાંજે 6 વાગ્યાની આસપાસ વીસીપરા મેઈન રોડ પર ગોવિંદભાઈના ડેલા પાસે, આરોપી પોતાની સ્કોર્પિયો કાર લઈને આવ્યો હતો અને શાહરૂખભાઈના મિત્રની ક્રેટા કાર (રજીસ્ટ્રેશન નંબર GJ-36-AR-4143) સાથે પોતાની સ્કોર્પિયો ભટકાડી હતી. આ ટક્કરથી ક્રેટા કારની જમણી સાઈડના દરવાજામાં, પાછળની સાઈડ તેમજ આગળના બમ્પરમાં મોટું નુકસાન પહોંચાડી આરોપી ત્યાંથી ભાગી ગયો હતો. આ બનાવ અંગે શાહરૂખભાઈએ તારીખ 20/04/2026 ના રોજ રાત્રે 22:10 વાગ્યે મોરબી સિટી બી ડિવિઝન પોલીસમાં ફરિયાદ નોંધાવતા પોલીસે આરોપી વિરુદ્ધ ભારતીય ન્યાય સંહિતાની કલમ 352, 351(3), 324(4) મુજબ ગુનો દાખલ કરી વધુ તપાસ હાથ ધરી છે.