26 ઓક્ટોબરથી 1 નવેમ્બર સુધી જૂનાં કપડાં, મીઠાઈ અને રમકડાં એકત્રિત કરાશે, દાતાઓના ઘરેથી વસ્તુઓ લેવા ટીમ પહોંચશે
મોરબી : દિવાળીના પર્વમાં જરૂરિયાતમંદ પરિવારોના ઘરમાં પણ ખુશીઓનો દીપ પ્રગટે તેવા હેતુથી મોરબીના હેપ્પી ફેમિલી ફાઉન્ડેશન ગ્રુપ દ્વારા સેવાકીય અભિયાન હાથ ધરવામાં આવ્યું છે. આ અભિયાન અંતર્ગત નાગરિકોને ઉપયોગમાં લઈ શકાય તેવાં જૂનાં કપડાં, મીઠાઈ અને રમકડાં દાનમાં આપવા અપીલ કરવામાં આવી છે. ફાઉન્ડેશન દ્વારા છેલ્લા પાંચ વર્ષથી આ પ્રકારની સેવાકીય પ્રવૃત્તિ કરવામાં આવી રહી છે.
આર્થિક મુશ્કેલીઓના કારણે અનેક પરિવારો માટે તહેવારની ઉજવણી કરવી પડકારરૂપ બને છે. આવા પરિવારો પણ દિવાળીના પર્વની ખુશીઓ માણી શકે અને તેમના બાળકોને તહેવારની મીઠાશનો અનુભવ થાય તે માટે ફાઉન્ડેશન દ્વારા આ પ્રયાસ કરવામાં આવી રહ્યો છે. મોરબીના નાગરિકોના ઘરમાં રહેલાં ઉપયોગી જૂનાં કપડાં, મીઠાઈ, રમકડાં સહિતની વસ્તુઓ જરૂરિયાતમંદ પરિવારો સુધી પહોંચાડવામાં આવશે. નાગરિકો તરફથી મળતો નાનકડો સહયોગ પણ કોઈ પરિવારના તહેવારને યાદગાર બનાવી શકે છે. આથી ઘરમાં ઉપયોગમાં લઈ શકાય તેવી વધારાની વસ્તુઓ હોય તો તેને જરૂરિયાતમંદો સુધી પહોંચાડવા માટે સહભાગી બનવા ફાઉન્ડેશન દ્વારા અનુરોધ કરવામાં આવ્યો છે.
આ અભિયાન અંતર્ગત 26 ઓક્ટોબરથી 1 નવેમ્બર સુધી વસ્તુઓ એકત્રિત કરવામાં આવશે.** દાન આપવા ઇચ્છુક નાગરિકો મોબાઇલ નંબર 8400008487 પર સંપર્ક કરી શકશે. દાતાઓને વસ્તુઓ પહોંચાડવા માટે બહાર જવું ન પડે તે હેતુથી ફાઉન્ડેશનની ટીમ તેમના ઘરે આવીને વસ્તુઓ સ્વીકારશે. મોરબીવાસીઓ પોતાના ઘરમાં રહેલી ઉપયોગી વસ્તુઓનું દાન કરીને જરૂરિયાતમંદ પરિવારોની દિવાળીમાં ખુશીઓનો ઉમેરો કરે અને તેમના ચહેરા પર સ્મિત લાવવામાં સહભાગી બને તેવી હેપ્પી ફેમિલી ફાઉન્ડેશન ગ્રુપ દ્વારા અપીલ કરવામાં આવી છે.
