મોરબી:આજના આધુનિક અને ભૌતિકવાદી યુગમાં જ્યાં યુવાનો મોજશોખ અને કારકિર્દી પાછળ દોડી રહ્યા છે, ત્યાં મોરબીના એક ૨૮ વર્ષીય ઉચ્ચ શિક્ષિત યુવતીએ સમાજને અલગ જ રાહ ચિંધી છે. મોરબીના મુમુક્ષુ વિધિબેન મહેતાએ સાંસારિક સુખ-સાહ્યબીને તિલાંજલિ આપી, લીંબડી ખાતે જૈન ભાગવતી દીક્ષા અંગીકાર કરી છે.
ભવ્ય દીક્ષા મહોત્સવની વાત કરીએ તો લીંબડીના આંગણે ત્રણ વર્ષના લાંબા વિરામ બાદ ફરી એકવાર શરણાઈના સૂર અને 'દીક્ષા લ્યો, દીક્ષા લ્યો' ના નાદ ગુંજી ઉઠ્યા હતા. લીંબડીમાં આવેલ શેઠ નાનજી ડુંગરશી સ્થાનકવાસી મોટા ઉપાશ્રય જૈન સંઘ દ્વારા આ મહોત્સવનું ભવ્ય આયોજન કરવામાં આવ્યું હતું.
આત્મયોગી ગચ્છાધિપતિ આચાર્ય ભગવંત શ્રી ભાવચંદ્રજી સ્વામીની પાવન નિશ્રામાં વિધિબેને સંયમ ધર્મનો સ્વીકાર કર્યો હતો.
આમ જોઈએ તો આ યુવા પેઢી માટે એક પ્રેરણારૂપ નિર્ણય હતો જેમાં મોરબી નિવાસી અશ્વિનભાઈ મહેતા અને અનિલાબેન મહેતાની સુપુત્રી વિધિબેન માટે સાંસારિક સુખોની કોઈ કમી ન હતી. તેમ છતાં, ભરયુવાનીમાં મોહ-માયા અને વિષય-વાસનાઓથી પર થઈને તેમણે આત્મકલ્યાણનો કઠિન માર્ગ પસંદ કર્યો છે. તેમનો આ ત્યાગ જૈન સમાજ અને ખાસ કરીને આજની યુવા પેઢી માટે એક દીવાદાંડી સમાન બની રહ્યો છે.
મહોત્સવની મુખ્ય વિશેષતાઓ પર નઝર કરીએ તો તેમાં દીક્ષા વિધિ પૂર્વે શહેરમાં એક ભવ્ય વરઘોડો (શોભાયાત્રા) કાઢવામાં આવ્યો હતો. જેમાં મોટી સંખ્યામાં શ્રાવક-શ્રાવિકાઓ જોડાયા હતા, જેનાથી સમગ્ર લીંબડી ભક્તિમય બની ગયું હતું.
ત્યારબાદ શાસ્ત્રોક્ત વિધિ મુજબ મંત્રોચ્ચાર સાથે દીક્ષા વિધિ સંપન્ન થઈ હતી. કેશલોચન બાદ વિધિબેને રંગબેરંગી વસ્ત્રોનો ત્યાગ કરી, શ્વેત વસ્ત્રો ધારણ કરી સંયમ જીવનમાં પ્રવેશ કર્યો ત્યારે દ્રશ્ય અત્યંત ભાવુક બન્યું હતું.
આચાર્યશ્રીનું વચન: આ પ્રસંગે આચાર્ય ભગવંતે આશીર્વચન આપતા જણાવ્યું હતું કે, "સંયમ એ જ આત્મકલ્યાણનો સર્વોત્તમ માર્ગ છે."
નવદીક્ષિત સાધ્વીજીના દર્શન કરવા અને તેમના ત્યાગને વંદન કરવા માટે લીંબડી તેમજ આસપાસના ગામોમાંથી જૈન-જૈનેતર સમાજના લોકો મોટી સંખ્યામાં ઉમટી પડ્યા હતા. લીંબડીની ધરા પર ભક્તિ અને વૈરાગ્યનો આ અનોખો સંગમ ઇતિહાસમાં કંડારાઈ ગયો છે
