રૂઢિગત માન્યતાઓને બાજુ પર મૂકીને મોરબીમાં ત્રણ દીકરીઓએ પિતા પ્રત્યેની ઉત્કૃષ્ટ ફરજ અને ઋણ અદા કરી સમાજ સમક્ષ એક પ્રેરણારૂપ ઉદાહરણ પૂરું પાડ્યું છે.
મોરબી: મોરબી જિલ્લા પંચાયતના કર્મચારી પૂજાબેન પંડ્યાના પિતા નવીનચંદ્ર લાભશંકર પંડ્યાનું અવસાન થતાં, પરિવારમાં કોઈ પુત્ર ન હોવાથી પૂજાબેન તેમજ તેમની બહેનો ધારાબેન અને નેહાબેને સાથે મળીને પિતાની તમામ અંતિમવિધિ સંપન્ન કરી મુખાગ્નિ આપ્યો હતો. દીકરો જ મોક્ષ અપાવી શકે એવા વર્ષો જૂના સામાજિક વહેમને તોડી આ ત્રણેય દીકરીઓએ સાબિત કરી બતાવ્યું કે સંતાન તરીકે દીકરો હોય કે દીકરી, માતા-પિતા પ્રત્યેનો પ્રેમ, આદર અને અંતિમ ફરજ સમાન હોય છે. આ નિર્ણય માત્ર પિતા પ્રત્યેની સાચી શ્રદ્ધાંજલિ નથી, પરંતુ સમગ્ર સમાજની વિચારસરણીને નવી દિશા આપતું એક પરિપક્વ પગલું છે.
