મોરબી : મોરબીમાં ગઈકાલે અચાનક વાતાવરણમાં પલટો આવતા ધૂળની ડમરીઓ અને ભારે પવન સાથે મિની વાવાઝોડા જેવી સ્થિતિ સર્જાઈ હતી.જેના કારણે મોરબી અને આસપાસના વિસ્તારોમાં અનેક હોર્ડિંગ્સ-વૃક્ષો, વિજપોલ ધરાશાયી થયા હતા. ક્યાંક વિજપોલ નમી જવાથી આગજનીની ઘટના બની હતી. પણ સદભાગ્યે ક્યાંય પણ જાનહાની કે મોટી દુર્ઘટના સર્જાઈ ન હતી. જ્યારે મોરબી રાજકોટ હાઈવે પર અનેક સ્થળોએ હોર્ડિંગ્સ ધરાશાયી થવાના બનાવો સામે આવ્યા છે. હાઈવે પર પવનનો વેગ એટલો તીવ્ર હતો કે રસ્તાની આસપાસ લગાવવામાં આવેલા મોટા બોર્ડ અને હોર્ડિંગ્સ કાગળની જેમ ફંગોળાઈ ગયા હતા. આ ધૂળિયા વાતાવરણ અને ઉડતા હોર્ડિંગ્સને કારણે વાહનચાલકોને ભારે હાલાકીનો સામનો કરવો પડ્યો હતો અને દ્રશ્યતા (visibility) ઓછી થતા અકસ્માતનું જોખમ પણ વધી ગયું હતું. સદનસીબે કોઈ જાનહાનિના સમાચાર પ્રાપ્ત થયા નથી.