ટૂંક સમયમાં મોરબીમાં ભવ્ય કાર્યક્રમ યોજાશે.
જૂનાગઢ: તાજેતરમાં કેન્દ્ર સરકાર દ્વારા વર્ષ 2026 માટેના પદ્મ પુરસ્કારોની જાહેરાત કરવામાં આવી છે. જેમાં જૂનાગઢના લોકલાડીલા કલાકાર શ્રી હાજી મીર કાસમ, જેઓ 'હાજી રમકડું' ના હુલામણા નામથી જાણીતા છે, તેમને પદ્મશ્રી એવોર્ડ માટે પસંદ કરવામાં આવ્યા છે. આ ગૌરવવંતી ક્ષણે મોરબીના અગ્રણીઓએ રૂબરૂ મુલાકાત લઈ તેમનું અભિવાદન કર્યું હતું.
મુલાકાતની મુખ્ય વિગતો પર નજર કરીએ તો:
જેમાં ઉપસ્થિત મહાનુભાવો માં મોરબી જિલ્લાના જાણીતા એડવોકેટ અને સંસ્કારભારતીના 'કલા ધરોહર' સંયોજક શ્રી મિતેષ દિલીપકુમાર દવે, એડવોકેટ શ્રી દર્શનભાઈ દવે, યુવા લેખક શ્રી પરમભાઇ જોલાપરા અને તેમના સાથી મિત્રોએ ખાસ જૂનાગઢ જઈને હાજીબાપાની મુલાકાત લીધી હતી.
સન્માન અને અભિવાદન: મોરબીના આ પ્રતિનિધિમંડળે પદ્મશ્રી જેવું સર્વોચ્ચ સન્માન મળવા બદલ શ્રી હાજી રમકડુંનું શાલ ઓઢાડી અને પુષ્પગુચ્છ આપી ઉષ્માભર્યું સ્વાગત અને સન્માન કર્યું હતું.
જૂની યાદો તાજી કરી: આ મુલાકાત માત્ર ઔપચારિક ન રહેતા એક આત્મીય મિલન બની રહી હતી. તમામ મિત્રોએ હાજીબાપા સાથે એક કલાકથી વધુ સમય વિતાવ્યો હતો અને સંગીત તથા કલાક્ષેત્રની જૂની યાદો વાગોળી હતી.
મોરબીમાં ભવ્ય કાર્યક્રમનું આયોજન: આ તકે, હાજીબાપાનું મોરબી આંગણે પણ યથાયોગ્ય સન્માન થાય તે હેતુથી, ટૂંક સમયમાં મોરબી ખાતે એક ભવ્ય અભિવાદન કાર્યક્રમ યોજવા અંગેની ચર્ચા પણ કરવામાં આવી હતી.
આમ, સૌરાષ્ટ્રની લોકકલાને જીવંત રાખનાર કલાકારની કદર કરી મોરબીના યુવાનો અને અગ્રણીઓએ કલાપ્રેમનું ઉત્તમ ઉદાહરણ પૂરું પાડ્યું હતું.
