વિવિધ સરકારી વિભાગોની સંયુક્ત કાર્યવાહીથી ખેડૂત આંદોલનમાં ફરી ગરમાવો; આગેવાનોએ કાર્યવાહીને વેરવિખેર કરવાનો પ્રયાસ ગણાવ્યો
મોરબી : મોરબીના જેતપરથી શરૂ થયેલા વીજલાઈન વળતર મુદ્દાના ખેડૂત આંદોલન વચ્ચે વધુ એક ખેડૂત આગેવાનના સ્થળે વિવિધ સરકારી વિભાગોએ સંયુક્ત સર્ચ ઓપરેશન હાથ ધરતાં સમગ્ર મામલો ફરી ચર્ચાના કેન્દ્રમાં આવ્યો છે. આ કાર્યવાહી બાદ ખેડૂત આગેવાનોમાં ભારે નારાજગી જોવા મળી રહી છે. કાર્યવાહી પાછળ આંદોલનને નબળું પાડવાનો પ્રયાસ થઈ રહ્યો હોવાના આક્ષેપો પણ કરવામાં આવ્યા છે.
વિવિધ વિભાગોની ટીમોએ સ્થળ પર પહોંચી જરૂરી તપાસ અને ચકાસણીની કાર્યવાહી હાથ ધરી હતી. જોકે કાર્યવાહી દરમિયાન કોઈ અનિયમિતતા મળી કે નહીં તે અંગે સંબંધિત વિભાગો તરફથી સત્તાવાર વિગતો જાહેર કરવામાં આવી નથી. બીજી તરફ ખેડૂત આગેવાનોનું કહેવું છે કે છેલ્લા કેટલાક દિવસોથી ખેડૂત આંદોલન સાથે જોડાયેલા લોકોને નિશાન બનાવી અલગ-અલગ પ્રકારની સરકારી કાર્યવાહી કરવામાં આવી રહી છે અને તેને તેઓ દબાણની નીતિ તરીકે જોઈ રહ્યા છે.
ઉલ્લેખનીય છે કે વીજલાઈન વળતર મુદ્દે શરૂ થયેલા ખેડૂત આંદોલન બાદ જિલ્લામાં સતત નવા કાર્યક્રમોની જાહેરાત થઈ રહી છે અને ખેડૂતો વિવિધ તબક્કે લડતને વધુ મજબૂત બનાવવાનો દાવો કરી રહ્યા છે. આવી સ્થિતિમાં ખેડૂત આગેવાનના સ્થળે થયેલા સર્ચ ઓપરેશને સમગ્ર પ્રકરણને વધુ ગરમાવ્યું છે. જોકે કાર્યવાહી અંગે સરકાર કે સંબંધિત વિભાગો તરફથી આક્ષેપોને લઈને કોઈ સત્તાવાર પ્રતિક્રિયા સામે આવી નથી.
