8 થી 9 વર્ષ અગાઉ બિલ્ડરે સોસાયટી બનાવ્યા બાદ સુવિધાઓ આપવામાં દરકાર જ ન કરતા અંતે પાણીની હાડમારી વધતા રહીશોનો આક્રોશ સાતમા આસમાને

હળવદ : હળવદ શહેરના રાણેકપર રોડ પર વોર્ડ નંબર 5 માં આવેલ રામ વિલા બંગલોઝ 2 માં રહેતા 65 થી 70 જેટલા પરિવારજનો પ્રાથમિક સુવિધાઓથી વંચિત હોવાની રાવ ઉઠી છે. સોસાયટીના રહીશો દ્વારા બિલ્ડર વિરુદ્ધ છેતરપિંડીની ફરિયાદ ગ્રાહક સુરક્ષામાં કરવાની તજવીજ હાથ ધરવામાં આવી છે.

સોસાયટી 8 થી 9 વર્ષ પહેલા બનાવવામાં આવી હતી. મકાન ખરીદતી વખતે બિલ્ડરો દ્વારા રહીશોને 14 જેટલી જુદી જુદી સુવિધાઓ આપવાનું વચન આપવામાં આવ્યું હતું. આ પ્રોજેક્ટ અંતર્ગત કુલ 200 મકાનો બનાવવાનો પ્લાન હતો, જેમાંથી હાલ અડધું કામ પહોંચ્યું છે. પરંતુ, 8 થી 9 વર્ષ વીતવા છતાં રહીશોને વચન મુજબની સુવિધાઓ મળી નથી.
 

રહીશોનો આક્ષેપ છે કે બિલ્ડર દ્વારા નક્કી કર્યા મુજબની કોઈ પણ સુવિધા હજુ સુધી આપવામાં આવી નથી. પરિસ્થિતિ એ હદે વણસી છે કે છેલ્લા 5 દિવસથી સોસાયટીમાં પાણી પણ આપવામાં આવ્યું નથી. આ ઉપરાંત, આખી સોસાયટીમાં સ્ટ્રીટ લાઈટની સુવિધા ક્યાંય જોવા મળતી નથી અને ગાર્ડન પણ વ્યવસ્થિત નથી.

સુવિધાઓના અભાવે અનેક મુશ્કેલીઓનો સામનો કરી રહેલા સોસાયટીના લોકો આ સમસ્યાઓથી તંગ આવીને રાત્રે એકઠા થયા હતા. બિલ્ડરો દ્વારા તેમની સાથે છેતરપિંડી કરવામાં આવી હોવાની રાવ સાથે તમામ રહીશો આજે વ્યક્તિગત રીતે ગ્રાહક સુરક્ષામાં બિલ્ડરો વિરુદ્ધ ફરિયાદ નોંધાવવા જશે.