અંદાજે ૧૨ મીટર પહોળો સી.સી. રોડ બનશે: ભૂગર્ભ ગટરની સમસ્યાને દૂર કરવા માટે નવી ૬૦૦ મિ.મી. વ્યાસ ધરાવતી ડ્રેનેજ લાઇન નખાશે

મોરબી : મોરબી શહેરના વીસીપરા મેઈન રોડ પર ડ્રેનેજ લાઇન અને સી.સી. રોડ બનાવવાનું કામ મંજૂર કરવામાં આવ્યું છે. ગુજરાત મ્યુનિસિપલ ફાઈનાન્સ બોર્ડે આ કામ માટે ૫ કરોડ રૂપિયાની સૈદ્ધાંતિક મંજૂરી આપી છે, જે મોરબી મહાપાલિકા દ્વારા હાથ ધરવામાં આવશે.

મહાપાલિકાના સીવીલ અને સીટી બ્યુટીફિકેશન શાખા દ્વારા જારી કરવામાં આવેલી અખબારી યાદી મુજબ, આ રોડ પર અંદાજે ૧૨ મીટર પહોળો સી.સી. રોડ બનાવવામાં આવશે. આ સાથે જ, આ વિસ્તારમાં વારંવાર ઉભરાતી ભૂગર્ભ ગટરની સમસ્યાને દૂર કરવા માટે નવી ૬૦૦ મિ.મી. વ્યાસ ધરાવતી ડ્રેનેજ લાઇન પણ નાખવામાં આવશે. આ પ્રોજેક્ટ માટેનો DPR (ડિટેઈલ્ડ પ્રોજેક્ટ રિપોર્ટ) મહાપાલિકા દ્વારા તૈયાર કરી દેવામાં આવ્યો છે. ટૂંક સમયમાં જ આ કામ માટે ઓનલાઇન ટેન્ડર બહાર પાડવામાં આવશે અને કામગીરી શરૂ કરવામાં આવશે. આ કામ પૂર્ણ થવાથી વી.સી.પરા વિસ્તારના રહેવાસીઓને નવી સુવિધાઓનો લાભ મળશે.