મોરબીના નવલખી રોડ પર રેલવે ટ્રેક ક્રોસ કરતી વખતે ટ્રેનની અડફેટે આવી જતાં 60 વર્ષીય વૃદ્ધનું કરુણ મોત નીપજ્યું હતું. આ બનાવની પ્રાપ્ત વિગતો અનુસાર મોરબીના નવલખી રોડ ઉપર આવેલા ઝૂંપડામાં રહેતા ભરતભાઈ રાયમલભાઈ નગાણી (ઉં.વ. 60) નવલખી ફાટક નજીકના ઓવરબ્રિજ નીચેથી રેલવેના પાટા ક્રોસ કરી રહ્યા હતા. આ દરમિયાન પાટા પરથી પસાર થતી ટ્રેનની અડફેટે આવી જતાં તેઓને ગંભીર ઈજાઓ પહોંચી હતી અને ઘટનાસ્થળે જ તેમનું મોત નીપજ્યું હતું. બનાવ બાદ મૃતદેહને પોસ્ટમોર્ટમ માટે મોરબીની સરકારી હોસ્પિટલ ખાતે ખસેડવામાં આવ્યો હતો. આ અંગે હોસ્પિટલ મારફતે મોરબી એ ડિવિઝન પોલીસને જાણ કરવામાં આવતા પોલીસે અકસ્માત મોતની નોંધ કરી આગળની કાયદેસરની કાર્યવાહી હાથ ધરી છે.