આર્યતેજ ઇન્સ્ટિટ્યૂટના આરોગ્ય કેમ્પમાં આરોગ્યની તપાસ, સારવાર અને માર્ગદર્શન સાથે બી.પી.ટી.ના 14 વિદ્યાર્થીઓએ પણ સેવાકીય કામગીરીમાં જોડાઈ ફિઝીયોથેરાપી અંગે જાગૃતિ ફેલાવી
મોરબી : આર્યતેજ ઇન્સ્ટિટ્યૂટ ઑફ ફિઝીયોથેરાપી, મોરબી દ્વારા તા. 23 સપ્ટેમ્બર, 2026ના બુધવારે ભરતનગર સ્થિત કોમ્યુનિટી હોલ ખાતે મફત ફિઝીયોથેરાપી આરોગ્ય કેમ્પનું આયોજન કરવામાં આવ્યું હતું. જેમાં 40 દર્દીઓએ લાભ લીધો હતો. દર્દીઓની ફિઝીયોથેરાપી સંબંધિત વિવિધ સમસ્યાઓની તપાસ કરી જરૂરી સારવાર, માર્ગદર્શન તેમજ ફિઝીયોથેરાપી અંગે સલાહ આપવામાં આવી હતી.
કેમ્પનું નેતૃત્વ ડૉ. દિક્ષીતા વોરા અને ડૉ. ભક્તિ અંબાસણા દ્વારા કરવામાં આવ્યું હતું. આ સેવાકીય પ્રવૃત્તિમાં બી.પી.ટી.ના બીજા વર્ષના 14 વિદ્યાર્થીઓએ પણ ઉત્સાહપૂર્વક ભાગ લીધો હતો. વિદ્યાર્થીઓએ દર્દીઓની તપાસ અને સારવારની પ્રક્રિયામાં સહભાગી બનવાની સાથે ડૉક્ટરો સાથે મળીને સ્થાનિક લોકોમાં ફિઝીયોથેરાપી અંગે જાગૃતિ ફેલાવતી વિવિધ પ્રવૃત્તિઓમાં પણ સક્રિય કામગીરી કરી હતી.
આ દરમિયાન લોકોને ફિઝીયોથેરાપી શું છે, કઈ પ્રકારની સમસ્યાઓમાં તેનો ઉપયોગ થઈ શકે છે તથા સ્વાસ્થ્ય માટે તેના વિવિધ લાભો અંગે માહિતી આપવામાં આવી હતી. આ રીતે કેમ્પમાં સારવારની સાથે ફિઝીયોથેરાપીના ઉપયોગ અંગે લોકોમાં સમજણ વધારવાનો પ્રયાસ કરવામાં આવ્યો હતો.
સમગ્ર કેમ્પનું સંચાલન ડૉ. રાહુલ છતલાણીના માર્ગદર્શન હેઠળ કરવામાં આવ્યું હતું. કેમ્પના આયોજન બદલ શ્રી આર્યતેજ ગ્રૂપ ઑફ કોલેજીસના મેનેજમેન્ટ દ્વારા ઇન્સ્ટિટ્યૂટના ફેકલ્ટી સભ્યો તથા વિદ્યાર્થીઓના સેવાભાવી પ્રયાસોની પ્રશંસા કરવામાં આવી હતી. સાથે જ ભવિષ્યમાં પણ આવી આરોગ્યલક્ષી પ્રવૃત્તિઓનું આયોજન થતું રહે તેવી શુભેચ્છા વ્યક્ત કરવામાં આવી હતી.
