હિન્દૂ સનાતન સંસ્કૃતિની ઐતિહાસિક વિરાસત સમાન ભગવાન શ્રીરામ જન્મભૂમિ અયોધ્યામાં આગામી 22મીએ સમગ્ર દેશ માટે અતિ ગૌરવપ્રિય ભવ્યાતિભવ્ય ભગવાન શ્રીરામના બિરાજમાન એટલે રામ મંદિરના પ્રાણ પ્રતિષ્ઠા મહોત્સવ યોજાવાનો હોય આ ઐતિહાસિક પર્વ દરેક દેશવાસીઓ માટે અભૂતપૂર્વ હોવાથી સમગ્ર દેશની સાથે મોરબી જિલ્લો પણ પ્રભુ રામમય બની ગયો છે. તેથી મોરબી જિલ્લામાં પ્રથમ વખત ન ભૂતો ન ભવિષ્યતિની જેમ અયોધ્યામાં યોજાનાર આ પર્વને પણ ટંકારાના નાના રામપર ગામે  આયોજન કરી આરએસએસ પ્રેરિત ભવ્ય લોકડાયરો યોજાશે.

આગામી 22મીએ અયોધ્યામાં યોજાનાર રામ મંદિરના ભવ્ય પ્રાણ પ્રતિષ્ઠા મહોત્સવની જેમ જ ટંકારાના  નાના રામપર ગામે બે દિવસ સુધી ગામના રામજી મંદિરના પ્રાણ પ્રતિષ્ઠા મહોત્સવનું આયોજન કરવામાં આવ્યું છે. આ પ્રાણ પ્રતિષ્ઠા મહોત્સવ કાર્યક્રમ અંતર્ગત બે દિવસ સુધી વિવિધ પ્રસંગોની ઉજવણી કરવામાં આવવાની છે. જેમાં તા. 21ના સવારે 7:30 કલાકે મહાયજ્ઞનો પ્રારંભ થશે, બપોરના 2:30 કલાકે ભવ્ય શોભાયાત્રા નીકળશે. તેમજ તા. 22ના સવારે 10:30 કલાકે મૂર્તિ અભિષેક અને બપોરના 1:30 કલાકે બીંડુ હોમાશે. આ કાર્યક્રમની ઉજવણી અંતર્ગત તા. 22ના ભગવાનજીભાઈ કાલરીયાના નિવાસ સ્થાને મહાપ્રસાદનું પણ આયોજન કરવામાં આવ્યું છે. તેમજ રાત્રીના 9 કલાકે ભવ્ય લોકડાયરો યોજાશે. જેમાં બ્રિજરાજદાન ગઢવી, પુજાબેન ચૌહાણ, મિલન પટેલ, રવિ આહિર, જયંતિલાલ વ્યાસ સહીતના કલાકારો ઉપસ્થિત રહેશે. જો કે આ કાર્યક્રમમાં મહત્વની બાબત એ છે કે, મોટાભાગે ગૌશાળા માટે યોજાતો લોક ડાયરો આ ગામે કદાચ પ્રથમવાર આરએસએસ પ્રેરિત ડૉ. હેડગેવાર સ્મારક સમિતિના લાભાર્થે આ લોક ડાયરો યોજાશે. જેમાં થનાર તમામ આવક આ બન્ને સંસ્થાઓને અર્પણ કરાશે. આ ધાર્મિક કાર્યક્રમમાં ટંકારા તાલુકા તેમજ નાના રામપર ગામની ધર્મપ્રિય જનતાને ઉપસ્થિત રહેવા ભગવાનજીભાઈ કાલરીયાના પરિવાર દ્વારા અપીલ કરવામાં આવી છે.